Valtiopäivitten tehtävät
Valtiopäivät oon korkein päättävä kokkous Ruottissa. Joka neljäs vuosi Ruottin kansa valikoittee 349 henkilöä eustamhaan heitä valtiopäivilä. Niitä, jokka istuvat valtiopäivilä, kuttuthaan jäseniksi.
Päättää laista ja valtionpytjetistä
Yks valtiopäivitten tärkein tehtävä oon ette päättää laista. Lakiehotukset tulevat usseimiten hallitukselta mutta saattavat kansa tulla yheltä elikkä usealta valtiopäiväjäseneltä. Kaikki lakiehotukset valmistethaan valtiopäivitten valiokunnalta ennen ko valtiopäivät äänestävät niistä kamarissa.
Valtiopäivät päättävät kansa valtion ulosmenoista ja sisäletuloista valtionpytjetissä. Sen valtiopäivät tekevät jälkhiin ko hallitus oon esittänny pytjettiproposisuunin jossako oon ehotuksia millä laila valtion rahoja pittää käyttää.
Tarkastaa hallitusta
Yks muu tehtävä valtiopäivilä oon ette tarkastaa kunka hallitus hoitaa työnsä. Jäsenet saattavat antaa kysymyksiä hallituksen ministerille. Valtiopäivitten konstitysuunivaliokunta, KU, tarkastaa ette hallitus seuraa sääntöjä. Jos valtiopäivilä ei ole luottamusta pääministerhiin elikkä muihiin ministerhiin niin valtiopäivät saattavat äänestää epäluottamusjulistuksesta ministeriä vasten.
Tehhä töitä EU-kysymyksitten kansa
Valtiopäivät tekevät töitä EU-kysymyksitten kansa. Hallitus häätyy neuvotella valtiopäivitten kansa mitä linjaa Ruotti vettää EU:ssä. Sen lisäksi monet niistä ehotuksista joistako valtiopäivät päättävät tulevat alunperin EU:stä.
Yhessä hallituksen kansa valtiopäivät oon kansa matkassa muotostamassa ruottalaista ulkomaapolitiikkaa.