Työ valtiopäivilä
Valtiopäivilä oon 349 jäsentä jokka valikoithaan joka neljäs vuosi ylheisissä vaalissa. Kamari oon valtiopäivitten syän, mutta paljon polittisesta työstä tapahtuu kansa parttioryhmissä ja valiokunnissa.
Valtiopäivät ei ole palkanheet valtiopäiväjäseniä. Niilä oon heän äänestäjiltä tehtävä ette olla valtiopäivilä päätetyn aijan. Sen takia net saavat makson eikä tiliä. Yks jäsen hoitaa tehtävänsä ympäri vuorokauen, ympäri vuen. Tehtävä ei ole rajotettu valtiopäivätyöhöön. Sitä saattaa kansa tehhä esimerkiksi siinä vaalipiirissä missä jäsen oon valikoittu, muissa paikoissa elikkä ulkomaila.
Jäsenillä oon perusmakso 78 500 kruunua kuukauessa jotako net verottavat.
Jäsenet keskustelevat ja tekevät päätöksiä kamarissa
Kamari, elikkä pleenisali, oon valtiopäivitten syän. Täälä valtiopäiväjäsenet keskustelevat tärkeistä kysymyksistä ja täälä valtiopäivät tekevät heän päätöksiä.
Kamarissa piethään muun muassa keskusteuja asioista, interpelasuunikeskusteluja yksityisitten ministeritten kansa ja kysymyshetkiä hallituksen kansa. Suurempia keskusteluja niinku esimerkiksi parttiojohtajakeskusteluja, oon ympäri vuen. Parttiot saattavat kansa vaatia ette valtiopäivät pitävät keskustelun erityisen tärkeässä kysymyksessä.
Valiokunnat valmistavat päätöksiä
Suuri osa polittisesta työstä tehhään valtiopäiväparttioitten parttioryhmissä ja niissä 15 valiokunnissa.
Net jäsenet jokka kuuluvat samhaan parttihoon perustavat yhen parttioryhmän. Parttioryhmissä keskustelthaan kaikkia tärkeitä kysymyksiä ennen ko jäsenet lopulisesti ottavat kantaa valiokunnissa ja kamarissa.
Valiokunnissa jäsenet valmistavat kaikki päätökset joistako valtiopäivät päättävät. Ko yks valiokunta oon esittänny heän ehotuksen niin kaikki 349 eustajat ottavat kansaa ehotuksheen kamarissa.
Joka valiokunnassa oon 17 jäsentä. Valiokunnat oon niinku ”miinivaltiopäivät”, joka tarkottaa ette jäsenitten yhistelmä valiokunnassa kuvvaa valtiopäivitten muotoa. Suuriimalla valtiopäiväparttiolla oon kansa enniiten paikkoja joka valiokunnassa.
EU-lautakunnassa hallitus varmistaa ommaa EU-politiikkaa. Hallitus häätyy neuvotella EU-lautakunnan kansa ennen kokkouksia ministeriraatissa ja EU:n valtio- ja hallitusjohtajitten kokkouksissa Eurooppalaisessa raatissa.