Temokratii
Temokratii tarkottaa suunile kansanohjausta elikkä kansanvaltaa. Perusajatus temokratiila oon ette sillä joka oon kansalainen elikkä assuu yhessä maassa pittää olla maholisuus olla matkassa antamassa mielipitheitä kunka maata pittää ohjata. Ylheensä se tapahtuu säänölisitten vaalitten kautta.
Yks muu temokraattinen perusajatus oon ette kaikki ihmiset oon saman arvoset ja kaikila pitävät olla samat oikeukset. Temokratiissa sitä pittää saaja hunteerata ja tykätä mitä sitä halvaa ja saaja maholisuuen ilmasta omia mielipitheitä aukenhaisesti puhheessa elikkä kirjotuksessa.
Temokratii saattaa olla erin näköstä
Temokratiit saattavat toimia erilä laila ja temokraattiset maat oon valikoihneet eri tapoja ette järjestää kunka maata ohjathaan. Kaikhiin usseimilla temokraattisilla maila oon niin sanottu representatiivi temokratii. Se tarkottaa ette asukhaan säänölisissä vaalissa valikoittevat politiikkeriä jokka eustavat heitä ja ohjaavat maata. Ruotti oon representatiivi temokratii.
Suora temokratii oon ko asukhaat saavat olla matkassa päättämässä erityisestä kysymyksestä, esimerkiksi kansanäänestyksessä. Ruottissa oon pietty kansalisia kansanäänestyksiä esimerkiksi ytinvoimasta ja EU:n jäsenyyestä. Tavalisiimat kansanäänestykset oon neuvonantavat Ruottissa, ja politiikkerit ei tartte seurata äänestyksitten tuloksia.
Kuninkas oon valtionjohtaja mutta hällä oon pieni valta
Korkeimpaa eustaijaa yhele maalee kuttuthaan valtionjohtajaksi. Kuninkas elikkä hallitteva trotninki oon valtionjohtaja Ruottissa. Mutta valtionjohtajalla ei ole polittista valtaa Ruottissa, mutta hällä oon suurin piirthein vain sympoolisia toimia.