Ekstra vaalit
Ekstra vaalit valtiopäivile oon vaali jotako mennee pittää ortinaarie vaalitten välissä, käynissäolevan vaaliperiuutin aikana. Ekstra vaalit oon suurin piirthein niinku tavaliset vaalit, paitti ette valmistusaika oon lyhykäisempi.
Istuva hallitus saattaa päättää ekstra vaalista orinaarie vaalitten kesken. Silloin hallitus päättää vaalipäivän. Vaalia häätyy pittää kolmen kuun sisäle päätöksen jälkhiin.
Jos suuriimalla osala valtiopäivistä ei ole luottamusta pääministerhiin elikkä muuhuun ministerhiin se saattaa antaa niin sanotun epäluottamusjulistuksen ministeriä vasten. Jos valtiopäivät antavat pääministerille epäluottamusjulistuksen niin pääministeri ja hallitus häätyvät jättää paikkansa elikkä päättää ekstra vaalista.
Jos puhemiehen ehotusta pääministeristä ei hyväksytä
Ko hallitus oon eronu tehtävästä se oon puhemiehen asia ette ottaa esile ehotuksen uuesta pääministeristä. Jos puhemies epäonnistuu neljä kertaa peräkkää saahmaan hänen ehotuksen pääministeristä hyväksytyksi valtiopäiviltä niin ekstra vaalia häätyy pittää. Ekstra vaalia pittää siinäki taphauksessa pittää kolmen kuun sisäle.
Ei korvaa tavalisia vaalia
Ekstra vaalit ei muuta ortinaarie vaalitten aikaa. Net valtiopäiväjäsenet jokka valithaan ekstra vaalissa ei siis alota uutta neljänvuenperiuutia, ko istuvat seuraahvaan ortinaarie vaahliin.
Ekstra vaalit oon harvinhaisia Ruottissa. Ekstra vaalia ei ole pietty ko kerran jälkhiin ko temokratii astu voihmaan 1920-luvun alussa. Se oli vaali toisheen kamahriin 1 kesäkuuta 1958.