Näin paljon EU maksaa
EU:n toimintaa rahotethaan ko EU-maat maksavat makson EU:le joka vuosi. Makso perustuu muun muassa maan ekonoomishiin etelytykshiin. Enniimät rahoista menevät takashiin jäsenmaihiin tukena ja avustuksenna.
Yks ajatus EU-yhtheistyön kansa oon ette tasottaa ekonoomisia ja sosiaalia eroja maitten välissä. Suuri osa EU:n pytjetistä mennee rekiunaahliin kehityksheen, maapruukitukheen, tutkimuksheen ja klimattityöhöön, mutta kansa ette muuttaa enämpi miljööystävälisheen ja tikitaahliin EU:hyyn.
Ruottin EU-makso ja tuki EU:ltä
Net viis vuotta 2019– 2023 Ruotti makso 37–52 miljaartia kruunua vuessa EU:le ja sait valtiopytjetin kautta takashiin 12–18 miljaartia kruunua EU-tukea. Niitten rahoitten lisäksi EU-tukea mennee kansa suohraan EU-komisuunista esimerkiksi virastoile, yniversiteetile ja korkeakouluile Ruottissa.
EU:n pytjetti oon jaettu seittemhään aluheesheen. Enniiten rahhaa mennee aluheesheen Yhteenkuuluvuus ja arvot. Se sisältää muun muassa tukea rekiunaahliin kehityksheen ja tukea ette muuttaa enämpi miljööystävälisheen ja tikitaahliin yhtheiskunthaan.