Näin hallitus perustethaan
Hallitus saattaa istua jäljelä niin kauon ko sillä oon kylliksi tukea valtiopäivilä. Niitä oon monta syytä ette hallitusta tarttee erottaa virasta ja ette uuen hallituksen perustethaan.
Tavalisiin syy siiheen ette hallitusta erotethaan virasta oon ette hallitusparttio elikkä monen parttion koalisuuni menettävät osia heän tuesta valtiopäivilä vaalin jälkhiin. Silloin pääministeri saattaa valikoittea ette vapaehtosesti erota virasta, elikkä ette hänen pakotethaan lopettamhaan jälkhiin sen pääministeriäänestyksen jotako vaalin jälkhiin piethään valtiopäivilä.
Saattaa kansa olla tarve perustaa uuen hallituksen jos entisellä hallituksella oon ollu pakko lopettaa sen takia ette valtiopäivät oon antanheet epäluottamusjulistuksen pääministerille elikkä jos pääministeri oon valikoinu lopettamhaan muista syistä.
Istuva hallitus oon jäljelä väliaikhaisenna hallituksenna. Väliaikhainen hallitus hoitaa net juoksevat kysymykset mutta praksiksen mukhaan se ei pruukaa ottaa uusia polittisia alotheita.
Puhemies ehottaa uuen pääministerin
Ko hallitus oon erotettu virasta se oon puhemiehen tehtävä ette ehottaa uuen pääministerin. Puhemies puhhuu silloin kaikitten valtiopäiväparttioitten eustajitten kansa ette saaja selvile kellä pääministeriehokhaala oon suuriin tuki parttioitten kesken ja joka sen takia saattais tulla Ruottin seuraavaksi pääministeriksi ja perustaa hallituksen jotako valtiopäivät luottavat kylliksi. Puhemies neuvottellee varapuhemiesten kansa ja jättää sitten hänen ehotuksen valtiopäivile.
Ko puhemies esittää ehotuksen hään ilmottaa samala mikkä parttiot tulevat kuuhluun hallituksheen. Päämäärä oon ette löytää sen pääministeriehokhaan jollako oon suuriin maholisuus perustaa hallituksen jollako oon kylliksi tukea valtiopäiviltä.
Valtiopäivät äänestävät pääministeristä
Valtiopäiväjäsenet kamarissa kokkeilevat puhemiehen pääministeriehotusta äänestyksessä. Jos enämpi ko puolet valtiopäiväjäsenistä, niin sanottu vähhiinthääns 175, äänestävät ehotusta vasthaan se ei mene läpi. Muuten se oon hyväksytty.
Puhemiehelä oon neljä maholisuutta
Jos yks ehto pääministeristä ei saa kylliksi tukea niin puhemies häätyy puhutella parttiojohtajia uuesti, neuvotella varapuhemiesten kansa, ja sitten jättää uuen ehotuksen. Puhemiehelä oon neljä maholisuutta. Jos mikhään pääministeriehotus ei saa kylliksi tukea valtiopäivilä niin ekstra vaalia häätyy pittää kolmen kuun sisäle.
Pääministeri valikoittee muut ministerit
Se oon pääministeri joka päättää mikkä ministerit kuuluvat hallituksheen. Pääministeri pittää, niin hoppua ko maholista nimittelyn jälkhiin ilmottaa valtiopäivile mikkä henkilöt oon valikoittu ministeriksi hallituksessa.
Hallitusvaihtelu totheutethaan sitten formellisti niin sanotussa konseljissä slotissa. Se oon hallituskokkous jossako valtiojohtaja, niin sanottu se joka oon kuninkas elikkä hallitteva trotninki, joka oon puhheenjohtaja.