Valtiopäivät yhtheiskunnassa

Valtiopäivät

Valtiopäivät oon korkein päättävä kokkous Ruottissa. Valtiopäivitten tehtävhiin kuuluu ette päättää laista ja valtion pytjetistä. Valtiopäivät tarkastavat kansa kunka hallitus hoitaa tehtäviä. Päätökset jokka valtiopäivät tekevät jällaavat koko Ruottissa.

Hallitus

Ko äänestäjät oon valikoihneet mikkä 349 eustajat kuuluvat valtiopäivile niin valtiopäivät valikoittevat pääministerin. Sen jälkhiin pääministeri valikoittee mikkä ministerit kuuluvat hallituksheen. Valtiopäivät häätyvät antaa tukea elikkä kuitenki sallia hallitusta, muuten hallituksen saattaa pakottaa pois virasta.

Hallitus ohjaa maata, muun muassa esittämällä ehotuksia joistako valtiopäivät sitten päättävät. Hallituksella oon kansa vastuu ette totheuttaa niitä päätöksiä joitako valtiopäivät oon tehneet.

Virastot

Virastot pitävät huolehtia ette valtiopäivitten ja hallituksen päätökset totheutethaan. Virastot oon hallituksen alasia.

Kunnat

Ruottila oon 290 kuntaa. Joka kunnassa oon yks kunnanvaltuusto. Sielä kunnan politiikkerit tekevät päätöksiä jokka jällaavat justhiins sille kunnale.

Rekiuunit

Ruottissa oon 21 rekiuunia. Niitten päätehtävät oon ette huolehtia saihraanhoijosta ja kolektiivitrafikista. Rekiuunivaltuustossa tehhään polittiset päätökset rekiuunile.

Tuomioistuimet

Tuomioistuimitten tehtävä oon ette tuomita rikolisia ja ratkasta riitoja kansalaisitten välissä elikkä riitoja kansalaisitten ja virastoitten välissä. Kaikin pitävät olla tasa-arvoset lain eessä.

EU

Ruotti oon jäsen Eurooppalaisessa yniuunissa, EU. Net lait joistako Eu päättää vaikuttavat kaikkia jokka asuvat Ruottissa.

Meetiat

Meetiat oon matkassa vaikuttamassa yhtheiskuntaa. Meetiat tarkastavat esimerkiksi valtiopäiviä, hallitusta, virastoja ja organisasuunia.