Vaali EU:hyyn
Joka viies vuosi oon vaali Eurooppaparlamenthiin, useasti kuttuttu EU-vaaliksi elikkä Eurooppavaaliksi. Silloin kansalaiset Ruottissa ja muissa EU- maissa valikoittevat mikkä polittiset parttiot ja jäsenet oon matkassa päättämässä parlamentissä. Ensi EU-vaali oon vuona 2029.
Eurooppaparlamentti oon ainua EU-institysuuni joka valithaan suohraan ylheisissä vaalissa. Eurooppaparlamentissä oon 720 jäsentä EU:n 27 jäsenmaista. Määrä jäseniä yhestä maasta riippuu kunka suuri väestö maassa oon. Ruottila oon 21 jäsentä.
Äänestysoikeus EU-vaalissa
Oikeus äänestää ruottalaisessa EU-vaalissa oon sillä joka oon 18 vuotta viimisthääns vaalipäivänä ja sitäpaitti oon joko
- ruottalainen kansalainen joka oon elikkä oon ollu kansankirjoila Ruottissa, elikkä
- kansalainen muussa EU-maassa joka oon kansankirjoila Ruottissa ja oon ilmottannu ittensä ruottalaisheen äänestysluettelhuun viimisthääns 30 päivää ennen vaalipäivää.
Äänestysluettelu oon luettelu niistä henkilöistä joilako oon äänestysoikeus vississä vaalissa.
Sillä, joka halvaa tulla valituksi ruottalaiseksi jäseneksi Eurooppaparlamenthiin, pittää olla äänestysoikeus vaalissa ja olla numineerattu, niin sanottu valittu ehokhaaksi, polittiselta parttiolta.
Se joka oon ruottalainen kansalainen ja kansankirjoila muussa EU-maassa saattaa valikoittea ette äänestää sen maan vaalissa Eurooppaparlamenthiin. Sitä pittää silloin tarvita ilmottaa ittensä äänestysluettelhuun siinä maassa ette saaja maholisuuen äänestää. Se toimii erilä laila eri EU-maissa.
Se mennee äänestää etukätheisesti elikkä vaalipäivänä
Ruottissa EU-vaali oon samhaan laihiin ko vaalit valtiopäivile, rekiuuhniin ja kunthiin. Se jollako oon äänestysoikeus saapii äänestyskortin kotia preiviloohvaan ja saattaa sitten etukätheisäänestää elikkä äänestää vaalipaikala vaalipäivänä.
Ruottalaiset kansalaiset jokka asuvat ulkomaila saattavat lähättää heän äänet postin kautta elikkä äänestää ruottalaisissa ampasaatissa ja konsylaatissa.
Other languages on the website of The Swedish Election Authority