Kaja tholpe opre o governo
Jekh governo shaj te bešel po than ži kana siles dosta suporto katar o parlamento. Si maj but razlogurja sostar jekh governo musaj te mukel pesko tjan aj te tholpes opre aver nevo governo.
Butivar kana jekh governo si te mukel pesko than si kodo razlogo kana o partido vaj e koalitsia pa maj but patidurja kaj porunčin ando parlamento xasaven pengo suporto katar o parlamento pala so sas aba o alomos. Atunči o themaske ministro shaj te alosarel te mukel korkoro pesko than, vaj te avel forčime te mukel pesko than pale so inkerdjapes ando parlamento alosarimos pa themesko ministro pala so sas o alomos.
Shaj ke vi trebul te tholpes opre jekh nevo governo te si ke o angluno governo sas forčime te mukel pesko than ne kodo ke o parlamento muklea andre jekh bipačimoske razlogo pa themaske ministro vaj ke o themaske ministro alosardja korkoro mukel pesko than pe aver razlogurja.
O aktualo governo bešel pe pesko than sar jekh nakadimoske governo. Jekh nakadimoske governo lel sama pol ordinaríê pušimatar aba sar regula pala o praxiso či lel neve poltiko pravčo.
Parlamentoske mujalo del sugestija pa kon te avel themaske ministro
Kana jekh governo muklea pesko than si e buči le parlamentoske mujalo te del sugestija pa jekh nevo themaske ministro. O parlamentoske mujalo del duma le reprezentanturja katar le partidurja ando parlamento te lel rodel savo themaske ministro kandidato siles maj but suporto maškar le partidurja aj savo shaj te avel Švedoke nevo themaske ministro aj te thol opre jekh governo ne savo le partidurja ando parlamento silen dosta pačimos. O parlamentoske mujalo kerel divano le kaver ajunkturja kaj o parlamentoske mujalo aj mukel andre peski sugestija ko parlamento.
Kana o parlamentoske mujalo sikavel peski sugestija, mothol sa atunči save partidurja si te len partja ando governo. O skopo si te arakhel kodo themaske ministro kandidato savo siles maj baro posibiliteto te thol opre jekh governo kaj te avel les dosta suporto ando parlamento.
O parlamento alosaren o themaske ministro
E sugestija katar o parlementoske mujalo maj anglal rodelpes katar le parlamentoske reprzentanturja ando kamaro ne jekh alosarimos. Te si ke opral pa dopaš katar sa le reprezentanturja ando parlamento, so si minimo 175, te votin protivniko, e sugestija či nakavel. Te si kaver atunči si nakadi.
O parlamentoske mujalo siles štar daturja te zumavel
Te si k-e sugestija pa o themaske ministro či kidel dosta suporto o parlamentoske mujalo si te del duma le partidurja maj jekh data, te lel divano le kaver ajunkturja kaj o parlamentoske mujalo, aj pale te mukel andre jekh nevi sugestija. O parlamentoske mujalo siles čačimos te zumavel štar daturja. Te si ke či jekh sugestija či kidel dosta suporto katar o parlamento atunči si te inkerelpes extra alomos pa na maj dur sar trin šion.
O themaske ministro thol po than sa le kaver ministrurja
O themaske ministro si kon porunčil kon si le kaver ministrurja save si te bešen ando governo. Sigo pale so thodjapes opre o themaske ministro musaj te mukel andre ko parlamento save si le manuš save si te aven ministrurja ando governo.
O pharuvimos katar aktualo governo ko nevo governo si te avel formalizime po kastelo ne kodo so bušiol konseljo. Kado si jekh governamentoske kidimos kaj le themasko šefo, kodo so si împerato vaj împeračeasa, si prezidento.