Uchlepan forr riksdagen
Riksdagen aschar dova Svedikko prallstuno kettanepa. Svakko starrto bescht vällkrar dolla Svedikke temmengre 349 manuscha forr riksdagen kai karrar ledamöter.
Beslut palla lagar ta statsbudget
Jekk fonn riksdagens baredera uchlepan aschar te le beslut pallan neve lagar. Förslag avar som regel fonn regeninga, avvar motte ninna ava fonn je kokkaro stammo eller butter stammoa dre riksdagen, riksdagsledamöter. Svakko lagförslag dikkas to, dre je roddrepa glan stämma dre riksdagens kammare.
Riksdagen ler ninna beslut palla dolla temmengre vri-prejjsepan ta dinnstrepan. Dova keras senns riksdagen lett an je budget proposition fonn regeringa, kai pukkar tchakkes dolla temmengre lovijar ska brukas.
Pallan-dikkepa pre regeringen
Je vaver uchlepa riksdagen kammar aschar te pallan-dikka tchakke regeringen kerar vri siro buttepa. Riksdagsledamöter motte dela ministrar puttchepan palla vavera kovvar. Riksdagens konstitutionsutskott, KU, roddrar ta dikkar to tchakke regeringen pallan-jar vavera regler. Kanna riksdagen tchi kammar pattchepa to statsministern eller vaver ministern motte riksdagen stämma dre je misstroendeförklaring to’an ministern.
EU-puttchepan dre buttepan
Riksdagen buttar ninna mé EU-puttchepan. Regeringen achar tvungen te rakkra kettanes riksdagen palla dova Svedikko dikkepa to vavera puttchepan dre EU. Butt fon dolla förslag kai beslutas dre riksdagen avar fonn EU.
Kettanes regeringa aschar riksdagen ninna te kera pre je Svedikko utrikespolitik.