Vällkrepa to EU
To Europaparlamentet aschar vällkrepa svakko panschto berscht. Dova karrar EU-val eller Europaval. Dalla vällkrar dolla Svedikko-temmengre ta dolla vavra EU-temmengre save politikke partier ta ledamöter kai motte ava to parlamentet forr te le beslut. Dova vaver vällkrepa aschar 2029.
Europaparlamentet aschar kokkaro EU-institution kai avar vällkerdo fonn allmänna vällkrepan. Dre Europaparlamentet aschar 720 ledamöter fonn 27 EU:ngre medlems-temmar bestchte. Kessi ledamöter je temm kammar avar an pre tchakke butt temmengre dova temm kammar. Svedikko-temmen kammar 21 ledamöter.
Horrtepa te dela si stämma dre vällkrepa to EU
Dollo kai kammar 18 berscht kammar horrtepa te dela si stämma dre vällkrepa to EU, ta ninna aschar
- Svedikko temmengro eller aschar ranndrado dre svedikko-temmen, eller
- aschar temmengro fonn je vaver EU:ngro temm ta aschar ranndrado dre Svedikko-temmen, ta har ranndrat sé pre dova Svedikko röstlängd tchi kuttier fonn 30 divesa glan vällkrepa.
Röstlängd aschar je lill kai manuscha kai kammar horrtepa te dela si stämma to je vällkrepa aschar randrade pre.
Dollo kai volltrat te ava vällkerdo kai Svedikko ledamot dre Europaparlamentet aschar tvungen te kamma horrtepa te stämma dre vällkrepan ta ascha hanndrado kai nominerad fonn je politikko parti.
Dollo kai aschar Svedikko-temmengro ta aschar ranndrado dre je vaver EU-temm motte dela siro stämma dre dolleskro temmengro vällkrepa to Europaparlamentet. Jekk motte måhända ranndra sé pre röstlängden dre dova temm forr te le möjlighet te dela si stämma.
Jekk motte dela si stämma glaner eller pre dives forr vällkrepa
Dre Svedikko-temmen keras vällkrepan vri tchakkes vällkrepa to riksdag, region ta kommun. Dollo kai ler je röstkort to siro lillengro-mokkto motte dela si stämma glaner, eller pre je städo te stämma kai aschar kerdo pre dova dives vällkrepan keras vri.
Svedikke temmengre kai boddrar dre vaver temm motte bischtra siro stämma per post eller ja to je Svedikko ambassad eller konsulat.
Other languages on the website of The Swedish Election Authority