Tchakke regeringen keras pre
Je regering motte bescha menns dollo kammar stöd fonn riksdagen. Forr butten skäl motte je regering parras vri ta je nevo ava beschto.
Sosske je regering parras vri aschar vanligvis kanna dollo mukkar stammoa dre riksdagen pallan je vällkrepa. Kanna tchakke sker motte statsministern mukka siro stammo soles, eller så avar lo stakkrado nikklis masskar je statsministeromröstning, kai keras pre dre riksdagen pallan vällkrepan.
Måhända motte je nevo regering keras to om dova vago aschat tvungna te ja tele passke je misstroendeförklaring fonn riksdagen to’an statsministern, eller om je statsminister mukkat siro stammo forr vavera skäl.
Je vri-parrado regering beschar tellan tchiron kai jar to kanna dova nevo regering aschar kerdo to. Je savo övergångsregering kerar vri siro buttepa avvar ler tchi an neve politikke beslut.
Talmannen föreslår forr kommen te ava statsministern
Kanna je regering stakkrat tele aschar do forr talmannen te föreslå ne nevo statsminister. Jå rakkrar tchakkes to rakkrepangre fonn sassare politikke partier dre riksdagen forr te hejja konn dolla dennkrar hunkar lattcho kai statsminister. Dollo kai kammar buttedera stämmer masskar sassaren hanndras pre kai förslag to statsminister ninna uchlepa te kera to je nevo regering. Palla rakkrepa kettanes dolla vice talmän delar talmannen siro förslag to riksdagen.
Kanna talmannen hanndrar pre siro förslag pukkar lo ninna save politikke partier kai aschar te bescha dre regering. Sillon aschar te lattcha dollo statsministerkandidat kai kammar dosta baro stöttning fonn riksdagen forr te hunka statsminister.
Riksdagen delar si stämma palla statsministern
Riksdagens beddosa ler te dela si stämma to dova fonn talmannen föreslagna statsminister. Kanna butter fonn pasch-parten fonn sassaren dre riksdagen, alltså tchi kuttier fonn 175 stammoa, aschar förslaget tchivvrat tele. Annars aschar dova lett an.
Talmannen kammar starr försök
Om ett förslag till statsminister inte får tillräckligt stöd måste talmannen prata med partiledarna igen, överlägga med de vice talmännen, och därefter lämna ett nytt förslag. Talmannen har fyra gånger på sig. Om inget förslag till ny statsminister får tillräckligt stöd i riksdagen ska ett extra val hållas inom tre månader.
Kanna je förslagen statsminister tchi les an aschar talmannen pali tvungen te rakkra to rakkrepangrena fonn dolla politikke partier. Fonn lenngre rakkrepan hanndrar talmannen pre je nevo förslag. Jå kammar starr vollter te lattcha je statsminister kai motte les an fonn riksdagen. Annars ska je extra vällkrepa keras pre glan trinn monnter.
Statsministern ler vri dolla vavera ministrar
Statsministern pukkar save manuscha ska bescha kai minister dre regeringen. Siggt palla je statsminister letts an ska dollo pukka to riksdagen save manuscha lo lett an kai ministrar.
Parrepan fonn puro to nevo regering keras pre filaschnija dre Stockholm, ta karrar konselj. Odojj hunkar dova Svedikko krajjo eller kralisa prallstuno.