Talmannens buttepa
Talmannen kammar uchlepa forr te dikka to tchakkes riksdagens buttepa planeras ta keras. Talmannen kammar hasstrepa fonn Riksdagsförvaltningen dre rakkrepan to riksdagspartiernas rakkrepangre kanna lo leder buttepan dre riksdagen. Jo leder trissepan dre kammaren ta aschar dova glanduno rakkrepaskro forr riksdagen dre temmengre ta masskar-temmengre puttchepan.
Talman aschar dova preddera stammo je manusch motte vällkras to dre Svedikko-temmen. Lesskro rang aschar tellan krajjon, avvar predder statministern.
Talmannen föreslår konn motte ava statsminister
Je baro uchlepa forr talmannen aschar te kera pre rakkrepan kanna regeringsskifte keras, ta dalla föreslå je nevo statsminister. Svedikko-temmen aschar tchakkes unikt. Dre vavera parlamentariska demokratier aschar statschefen dollo kai leder regeringsskiftet.
Riksdagens talman ster vri’ann politikko buttepa dre riksdagen. Jo aschar je vällkrado riksdagledamot avvar aschar tchi ninna utskottsarbete eller vavera stämmer ta rakkrepan dre kammaren.