Tchakkes aschar EU kerdo

EU-kommissionen delar förslag to neve EU-lagar ta dikkar to tchakke EU:temmarna ler an dolla. Dre EU-kommissionen beschar je kommissionär fonn svakko EU-temm, ta jonn aschar kettanes representant forr saro EU. Je nevo kommission les vri svakko panschto berscht.

Ministerrådet ler beslut palla neve EU-lagar, oftast kettanes ninna Europaparlamentet. Dova Svedikko regering aschar dre trissepan ninna jekk minister, kettanes vavera temmengre ministrar dre EU:ngro ministerråd. Savo minister kai aschar ninna avar an pre save puttchepan kai aschar pre forr rakkrepa. Ministerrådet trissas kai dess vavera kettanepan, savo, avar an pre trissepans politikko område.

Europaparlamentet ler an neve EU-lagar, oftast kettanes ministerrådet. Svakko panschto berscht vällkras neve ledamöter forr Europaparlamentet vri fonn dolla temmengre dre sassare EU-temmar, dre vällkrepan.

Europeiska rådet pukkar tchakkes dova EU:ngro buttepa ska keras vri vidder kettanes. Dre Europeiska rådet trissas EU-temmengre temmgengre ta regeringengre chefer. Fonn Sveddiko-temmen aschar dova statsminister ninna.

EU-domstolen delar pagg dre fejder masskar EU:ngre institutioner ta EU-temmar. Domstolen tolkar ninna dolla EU:ngre lagar.

Europeiska revisionsrätten pallan-dikkar tchakke EU:ngre lovija brukas ta redovisas horrta.

Europeiska centralbanken kammar uchlepa te rakka politik palla lovengre puttchepan dre temmar kai kammar euron kai lovijar, ta ninna te stötta allmän ekonomisk politik.

Riksdagen ta EU

Jekk fonn dolla riksdagengre glandune puttchepan aschar te le beslut palla neve lagar. Kai medlem dre EU aschar je kotta fonn dó Svedikko-temmeskro makt dre kalla puttchepan delad to EU. Riksdagen motte trots dova påverka dolla lagar EU ler an.

Regeringen aschar rakkrepaskro forr Svedikko-temmen dre dova EU:ngro minsterråd ta dre Europeiska rådet. Avvar dolla regeringre ministrar avar dosta ofta to riksdagen forr te rakkra palla puttchepan fonn EU, kai kanna rakkrepan aschar dre utskott. Glan je minister tradrar to EU, forr te le beslut pallan je nevo EU-lag, aschar regeringen tvungen te glaneder rakkra palla sire dennkrepan ta siro dikkepa pre förslaget dre dova riksdagengro EU-nämnd.

Riksdagen kammar ninna je vaver möjlighet te påverka lagförslag fonn EU-kommissionena. Dova Svedikko riksdag ta parlament dre vavera EU:ngre temma dikkar erst pallan om tchommena lagförslag avar beslutade fedder pre EU:ngro eller temmengro nivå. Alltså fonn EU eller fonn je temm dre siro jegno temm. Kavva karrar subsidiaritetsprövning. Dennkrepan aschar kai EU blott ska le beslut kai Dolla EU:ngre temma tchi soles naschtar te.

Fonn EU:ngro förslag to Svedikko lag.

EU-kommissionen delar förslag palla je Nevo EU-lag. EU-kommissionen kammar uchlepa forr te dela förslag to neve EU-lagar. Tchakkes kerar kommissionen pallan rakkrepan ta roddrepan pallan save neve EU-lager dolla EU:ngre temmar kammar bruk forr.

Regering ta riksdag dennkrar ta pukkar sire dennkrepan

EU-kommissionen bischtrar sire förslag to svakko temm dre EU. Dre Svedikko-temmen bischtras dolla to regering ta riksdag. Regeringen pennar to riksdagen så dollo dennkrar, ta ler riksdagengre dennkrepan fonn lennde masskar rakkrepan dre utskotten. Regeringen aschar rakkrepaskro forr Svedikko-temmen dre EU:ngro ministerråd, avvar regeringen aschar ninna uchlo glan riksdagen trujall puttchepan fonn EU.

Riksdagen dennkrar ninna trujall beslut pallan neve föreslagna EU-lagar motte les dre EU eller fedder dre svakko jegno temm. Dova kerepa karrar subsidiaritetsprincipen. Dova hejjas kai beslut aschar te les pre dova effektivedera möjligaste nivå.

Europaparlamentet ta ministerrådet ler an beslut

Ledamöter dre Europaparlamentet ta ministrar dre ministerrådet rakkrar palla förslag forr sé soles ta motte dela förslag to parrepan dre lagar. Dollen ler beslut palla butteder fonn EU:ngre lagar ta aschar te kamma je kettanes dikkepa pre puttchepan forr te le an je lag.

Svedikko-temmen ler an ta pallan-jar EU:ngre lagar

Kanna Europaparlamentet ta ministerrådet ler an je Nevo EU:ngro lag aschar dova te pallan-jas fonn Svedikko-temmen ta vavera EU:ngre temmar. Imansall aschar dosta forr regeringen eller myndigheter te kera to glaner regler je kutti, avvar imansall aschar je temmengro lag tvungen te parra ranndrepa. Dre Svedikko-temmen aschar regeringen uchlo te kera pre je förslag, proposition, to riksdagen. Pali ler riksdagen beslut palla lagen.

Regeringen, myndigheterna ta kommunerna dikkar to tchakke je nevo lag keras pre ta les an. Dolla Svedikke tchatchopan dikkar to tchakke lagar pallan-jas.

EU-kommissionen dikkar to tchakke dolla EU:ngre pallan-jar EU-lagarna. Kanna kommissionen dennkrar att Svedikko-temmen aschar doschalo te tchi pallan-ja je EU-lag motte kommissionen doschepa-kera Svedikko-temmen dre EU-tchatchopan.