Sar barjavaha falliba
Fallibos hin vojiba te peȟȟes aja duural sar leen hin passiba (stöttiba) aro parlamentos. Bi hin butvare doȟȟi, soske fallibos mote froojaves (falliba peerela) ta neevo falliba hin hyövime.
Saaruno doȟ fallibiako peeriboske hin douva, te fallibosko ringos elle butvare ringengo tšetano koalitios naȟuvena pengo passiba aro parlamentos paale themmuno velkiba. Dooleske ȟeeruno ministeros vojuvela tšeeres dömmös te jou/joi froojila pesko iego džintako dömmösta elle les/la hin mostiba te froojuves paale parlamentosko arruno rakkiba ta lengo velkiba prissi ȟeeruno ministeros.
Neevo falliba vojuvela aaves hyövime niina dooleske, ke paaluno falliba hin aaȟtas mostiba te froojuves, dooleske parlamentos hin diias bipassibosko lau ȟeeruno ministereske, elle ȟeeruno ministeros hin kamjas te froojuves vaure doȟȟengo kȟaal.
Tšenstavitiko falliba tšeerela butti kajo douva tiija kaana neevo falliba hin aulo barjime. Maȟkurno tiijako falliba tšeerela sakkadivisako saaki, bi leen joon na saarunes tšeerela tši neeve politikaane alsibi.
Parlamentosko Laaveskiiro tšeerela alsiba dotta koonesta aavelas
Kaana falliba hin froojudiilo, parlamentosko laaveskiires hin tilsvaariba te tšeeres alsiba neevo ȟeeruno ministeretta. Laaveskiiro rakkila dotta saare parlamentosko ringengo folkesko naalunensa, jakkes te jou/joi džaanelas douva koones hin koni butide passiba ta koon aaȟȟelas tšihko kanditaattos te aaves sar neevo ȟeeruno ministeros aro Sveittiko them ta barjaves neevo falliba, koones parlamentos delas lengo dosta passiba. Laaveskiiro rakkila lesko duito-laaveskiirensa ta paale douva jou dela lesko alsiba parlamentarikaano divisenge ta dela džaaniba nii dotta, save ringe barjavena neevo falliba.
Kammiba hin te laȟȟes ȟeeruno ministeros, koones hin koni tšihkide džaaniba ta passiba te barjaves ajasaavo falliba, koones hin dosta baro passiba aro parlamentos.
Parlamentos velkina dotta koonesta aavela ȟeeruno ministeros
Parlamentosko lende velkina aro lengo pherdino peȟȟiba laaveskiiresko alsibosta, koonesta aavela ȟeeruno ministeros. Ke butide sar paȟ folkesko naalunenna elle 175 lende velkina prissi alsibos, douva naa aavela bojjime. Vaurones douva aavela bojjime.
Laaveskiires hin staar varresko tiija lesko tšeeriboske
Ke alsiba na lela dosta passiba aro velkiba, laaveskiires hin mostiba te rakkaves pappales ringengo ȟeerunensa, hunnes duito-laaveskiire ta tšeeres neevo alsiba. Laaveskiires hin staar varruno tiija te tšeeres lesko alsibi. Ke alsibi ȟeeruno ministeroske na lela dosta passiba aro parlamentos, doolesko paalal hin mostiba te stelles tiljune velkiba kajo triin tšoonesko tiija.
Ȟeeruno ministeros naujila vaure ministere
Ȟeeruno ministeros tšeerela dömmös dotta, koon hin vaure fallibosko ministere. Ȟeeruno ministerosko tilsvaariba hin hastes lesko iego naujimosko paalal te del džaaniba parlamenteske dotta, koon hi vaure fallibosko ministere.
Fallibosko paruviba fanila tšenstavitikes aro Raadžako/Kralisko ȟlotta kai hin stellime konsilos. Dauva hin fallibosko samliba, kai laaveskiiro hin themmesko ȟeeruno Kralis elle vollakiiri Kralisa.