Butti aro Parlamentos
Aro Parlamentos hin 349 lendi, koonen aavena velkime sakka staar bereȟ aro folkesko saaruno velkibi. Parlamentosko bari hisba/peȟȟibosko saalos hin parlamentosko džii, bi baro dielos parlamentosko politikaano buttienna fanula niina aro ringengo gruppi ta vollakotšetibi.
Folkesko naalune na aaȟȟena parlamentesko buttikiire, bi leen hin lengo velkibongiirenna diino mandaattos te peȟȟes aro parlamentos lenge diino vollakotiija. Dooleske joon lena penge peȟȟibosko lyönos naa buttiako lyönos. Folkengo naalune tšeerela pengo butti 24 stunni/varresko tiija trystal hilo bereȟ. Lesko butti naa endo lesko butti aro parlamentos, bi jou/joi vojuvela tšeeres pesko butti aro lesko thaanavitiko velkibosko rigia kai jou/joi aulo velkime, elle aro vaure stedi ta auriako them.
Folkengo naalunengo botnosko peȟȟibiako lyönos hin 78 500 krooni sakka tšoon katta joon hyövyna presaves themmuno skattiba.
Parlamentosko lende rakkena tšetanes ta tšeerena pengo ȟluutibi aro bari hisba/peȟȟibosko saalos
Bari hisba elle peȟȟibosko saalos hin parlamentosko dži. Doori folkesko naalune rakkavena maȟkar peen fuortune saakenna ta parlamentos tšeerena pengo ȟluutibi.
Aro bari hisba (peȟȟibosko saalos) hin rakkibi maȟkar vaure saaki interpellaatioko (pertibosko) puȟȟibienna ministeressa koonesko tilsvaarime hin douva saaki, elle hilo fallibiessa. Baaride rakkibi, sar ringengo laveskiiresko rakkibi, aavela stellime trystal hilo bereȟ. Ringe hin vojime te puȟȟes, te parlamentos stellena rakkiba frooȟlaagimes fuortune saakenna.
Vollakotšetibi barjavena saare ȟluutibi
Baro dielos politikkaano buttiatta hin tšerto aro parlamentosko ringengo ringoskobuttiako gruppi ta aro 15 vollakotšetibi.
Itȟlaaga ringos ȟunjime lendi, tšeerena/farabina pengo iego politikaano ringosko gruppos. Saare fuortune saaki aavena anglunes rakkime aro ringengo gruppe angle douva ka paralamentosko lendi lena lengo ȟluutime stedos aro vollakotšetibi ta parlamentosko bari hisbako peȟȟiba.
Saare saaki aavena fäärdime parlamentosko lendenna aro vollakotšetibi. Ka vollakotšetiba hin sikadas pengo dömmösko alsiba, saare 349 parlamentosko lendi hin tiija te lel lengo stedos aro alsiba, ta douva joon tšeerena aro parlamentosko bari hisbako peȟȟiba.
Are saare vollakotšetibi hin 17 komuja (lendi), ta vollakotšetibi hin sar ”besko parlamentos”, so mienila, te vollakotšetibiengo samliba paljila hilo parlamentosko samliba. Koni paaride politikaano ringos hin koni butide stedi (skammi) are sakka vollakotšetibi.
Falliba sankila pengo EU-politiikkos arre aro EU Konsilos, ta fallibos hin mostiba te ȟunnes EU Konsiles angle lengo ministeriakokonsilosko samlibi ta angle EU themmengo- ta fallibiengo ȟeeruno ministerengo samlibi so aavena stellime angle Europako-konsilosko samlibi.