Riikkabeaivvi bargu
Riikkabeaivi lea alimus mearridanásahus Ruoŧas. Ruoŧa álbmot vállje juohke njealját jagi 349 olbmuid geat galget ovddastit sin riikkabeaivvis. Sii geat čohkkájit riikkabeaivvis leat áirasat.
Mearridit lágaid ja stáhtabušeahta
Okta riikkabeaivvi deháleamos bargguin lea mearridit lágaid. Láhkaevttohusat bohtet dábálaččat ráđđehusas muhto sii sáhttet maid boahtit ovtta dahje máŋga riikkabeaivveáirasiin. Buot láhkaevttohusat válbmejuvvot riikkabeaivve lávdegottis ovdal go riikkabeaivvi jienasta riikkabeaivvegámmáris.
Riikkabeaivi mearrida maiddái stáhta goluid ja dietnasiid stáhtabušeahtas. Riikkabeaivi mearrida dan áššis maŋŋel go ráđđehus lea ovdanbuktán bušeahttaevttohusa, gos leat evttohusat stáhta ruđaid geavahussii.
Dárkkista ráđđehusa
Riikkabeaivvi bargu lea maid dárkkistit got ráđđehusa bargu doaibmá. Áirasiin lea vejolašvuohta jearahallat ministariid ráđđehusas. Riikkabeaivvi vuođđolágalávdegoddi, KU, dárkkista ahte ráđđehus čuovvu njuolggadusaid. Jus riikkabeaivvis ii leat luohttámuš stáhtaministarii dahje eará ministarii de riikkabeaivvis lea vejolašvuohta jienastit eahpeluohttámuša ministara vuostá.
Bargá EU-jearaldagaiguin
Riikkabeaivi bargá EU- jearaldagaiguin. Ráđđehus ferte ráđđehallat riikkabeivviin Ruoŧa barggu birra EU:as. Máŋga dain evttohusain maid riikkabeaivi mearrida bohtet álggus EU:as.
Ráđđehus ja riikkabeaivi hábmeba ovttas ruoŧa olgoriikkapolitihkka.