Álbmotjienasteapmi
Álbmotjienasteapmi lea jienasteapmi gos jienasteaddjit mearridit ovtta politihkalaš áššis. Riikkabeaivi mearrida jus álbmotjienasteapmi galgá čađahuvvot riikkas. Gielddain ja regiovnnain maid lea vejolaš čađahit álbmotjienastemiid.
Ruoŧas leat guokte lágan álbmotjienasteamit mat gusket olles riikka, nu gohčoduvvon našuvnnalaš álbmotjienasteamit. Sii leat ráđđeaddi álbmotjienasteamit ja jienasteamit mat gusket vuođđolágaášši, ja sii sáhttet leat geatnegahtti muhtin áššis. Vuođđolágaáššin ii leat goassege čađahuvvon álbmotjienasteapmi Ruoŧas.
Našuvnnalaš álbmotjienasteamit leat spiehkastagat. Danin beare riikkabeaivi sáhttá mearridit jus našuvnnalaš álbmotjienasteapmi galgá čađahuvvot.
Jus riikkabeaivi mearrida čađahit našuvnnalaš álbmotjienasteami de riikkabeaivi váldá fápmui erenoamáš lága njuolggadusaid birra mat leat beare gustovaččat dan guoskevaš álbmotjienasteapmái. Doppe mearriduvvo omd. man jearaldaga galgá jearrat ja man beaivvi jienasteapmi galgá čađahuvvot. Muđui lea dábálaš ahte seammá njuolggadusat go riikkabeaivveválggain leat gustovaččat našuvnnalaš álbmotjienastemiin, omd. jienastanriekti, válgabire ja jienasteapmi.
Ráđđeaddi álbmotjienasteamit
Ráđđeaddi álbmotjienastemiid ii dárbbaš čuovvut. Jus ráđđeaddi álbmotjienasteamit leat čađahuvvon ovtta áššis de riikkabeaivi váldá loahpalaš mearrádusa áššis. Jurdda lea goit ahte jienasteapmi galgá addit ráđi riikkabeaivvemearrádussii.
Guhtta našuvnnalaš, ráđđeaddi álbmotjienasteamit
1922 Ruoŧas šattai vejolaš čađahit ráđđeaddi álbmotjienastemiid ja čađahuvvui maiddái seammá jagi. Jienasteapmi leai alkohola juhkosiid gildosa birra. Oktiibuot leat guhtta našuvnnalaš, ráđđeaddi álbmotjienasteami čađahuvvon Ruoŧas:
- 1922 gieldit alkohola juhkosiid
- 1955 johtolat gurutbealis olgešbeallái
- 1957 almmolaš lassepenšuvnna birra
- 1980 atomafámu birra
- 1994 EU-lahttuvuođa birra
- 2003 geavahit euro valuhtan Ruoŧas
Gielddalaš álbmotjienasteamit
Gielddain ja regiovnnain lea maid vejolaš čađahit álbmotjienastemiid. Sii leat álot ráđđeaddi.