Ná ráđđehus ásahuvvo
Ráđđedus lea fámus nu guhká go sis lea doarvái doarjja riikkabeaivvis. Gávdnojit máŋga ágga dasa ahte ráđđehus ferte heaitit ja ođđa ráđđehus dárbbaša ásahuvvot.
Dábálaččat ráđđehus heaitá go ráđđehusbellodat dahje dat bellodaga mat leat ráđđehusas masset oasi sin doarjagis riikkabeaivvis maŋŋel ovtta válgga. Dan dilis stáhtaministaris lea vejolašvuohta heaitit eaktodáhtolaččat dahje son sáhttá šaddat heaitit maŋŋel dan stáhtaministarjienasteami mii dollojuvvo riikkabeaivvis maŋŋel válggaid.
Ođđa ráđđehus maid ásahuvvo jus ovddeš ráđđehus lea šaddan heaitit dan geažil go riikkabeaivi lea váldán eahpeluohttámuš mearrádusa stáhtaministara vuostá dahje jus stáhtaministtar lea válljen heaitit eará ášši geažil.
Dat ráđđehus mii lea fámus doaibmá gaskaboddosaš ráđđehussan. Okta gaskaboddosaš ráđđehus barget beaivválaš áššiiguin, muhto geavada jelgii sii eai váldde ođđa politihkalaš initiatiivvaid.
Riikkabeaivvi ságadoalli evttoha stáhtaministara
Go okta ráđđehus lea heaitán de riikkabeaivvi ságadoalli bargu lea gávdnat evttohusa ođđa stáhtaministarii. Riikkabeaivvi ságadoalli ságasta buot riikkabeaivvebellodagaid ovddasteaddjiin oaidnin dihte man stáhtaministarevttohasas lea stuorimus doarjja bellodagaid gaskkas ja dalle sáhtášii šaddat Ruoŧa ođđa stáhtaministtar ja ásahit ráđđehusa masa riikkabeaivvis lea doarvái luohttámuš. Riikkabeaivvi ságadoalli ráđđehallá várre ságadoalliiguin ja buktá evttohusa riikkabeaivái.
Go riikkabeaivvi ságadoalli ovdanbuktá su evttohusa son maid dieđiha mat bellodagat leat ráđđehusas. Ulbmil lea gávdnat dan stáhtaministarevttohasa geas lea buoremus vejolašvuohta ásahit ráđđehusa ja mas lea doarvái doarjja riikkabeaivvis.
Riikkabeaivi jienasta stáhtaministara birra
Riikkabeaivveáirasat jienastit Riikkabeaivvegámmáris Riikkabeaivvi ságadoalli stáhtaministarevttohusa birra. Jus eanet go bealli riikkabeaiveáirasiin, namalassii unnimustá 175, jienastit evttohusa vuostá de evttohus ii vuoitte. Muđui lea dohkkehuvvon.
Riikkabeaivvi ságadoalli oažžu geahččalit njelljii
Jus okta stáhtaministarevttohus ii oažžu doarvái doarjaga de riikkabeaivvi ságadoalli ferte ságastit bellodatjođiheaddjiiguin oktii vel, ráđđehallat várre ságadoalliiguin, ja de easkka ovdanbuktit ođđa evttohusa. Riikkabeaivvi ságadoalli oažžu buktit evttohasaid njelljii. Jus ii oktage evttohus ođđa stáhtaministarii oaččo doarvái doarjaga riikkabeaivvis de fertejit liigeválggat čađahuvvot golmma mánu siste.
Stáhtaministtar nammada eará ministariid
Stáhtaminister mearrida ministariid ráđđehussii. Maŋŋel nammadeami, stáhtaministtar galgá ilmmuhit riikkabeaivái geat leat nammaduvvon ministariin ráđđehusas.
Ráđđehusmolsun čađahuvvo formálalaččat ráđđehusčoahkkimin stáhtaoaivámuččain šloahtas nu gohčoduvvon ruo. konselj. Dat lea ráđđehusčoahkkin gos stáhtaoaivámuš, namalassii son gii lea gonagas dahje dronnet, lea sátnejođiheaddji.